Кыргызстан Борбордук Азияда биринчи жолу өтө турган суу-мотордук спорт боюнча UIM F1H2O дүйнө чемпионатынын этабын өткөрүүгө даярдыкты аяктады. Өлкө мелдештерди өткөрүүгө толугу менен даяр. Бул тууралуу бүгүн маалымат жыйынында Туризмди өнүктүрүү боюнча мамлекеттик агенттиктин директору Эдуард Кубатов билдирди.

Эскерте кетсек, Кыргызстандын Гран-приси 31-июлда Ысык-Көлдүн жээгиндеги Бает айылында башталат.

Анын айтымында, бул этап Борбордук Азиянын тарыхында суудагы «Формула-1» сериясындагы биринчи, ошондой эле чемпионаттын бүткүл тарыхындагы эң бийик тоолуу мелдеш болуп калат. Жарыштар деңиз деңгээлинен 1607 метр бийиктикте өтөт.

Кубатов эл аралык турнирге даярдык эки ай бою жүргүзүлгөнүн белгиледи. Бул убакыттын ичинде көл жээгинде 10 миң көрүүчүгө ылайыкталган инфраструктура түзүлүп, эл аралык ивент-зона, командалар үчүн паддоктор, калыстар мунаралары, трибуналар жана VIP-зоналар жабдылды.

Мелдешке 20га жакын команданын жана дүйнөнүн эң күчтүү пилотторунун катышуусу күтүлүүдө. Алдын ала эсептөөлөр боюнча, жарышка 30дан ашык өлкөдөн коноктор келет, ал эми үч күндүн ичинде жалпы келгендердин саны 25 миңге жакын адамды түзөт.

Спорттук программадан тышкары көрүүчүлөр үчүн концерттер, аквабайк-шоулор жана башка көңүл ачуучу иш-чаралар даярдалган.

Мамлекеттик агенттиктин башчысынын айтымында, экологиялык коопсуздукка өзгөчө көңүл бурулду. Жаратылышты коргоо талаптарынын сакталышын көзөмөлдөө үчүн көз карандысыз экологдор жана эл аралык байкоочулар тартылган.

Кубатов Эл аралык суу-мотордук союз (UIM) техникага карата катуу экологиялык талаптарды коёрун баса белгиледи. Жарыш болиддери атайын күйүүчү майды колдонушат, ал эми колдонуудагы коопсуздук стандарттары көлдүн акваториясынын булганышына жол бербейт.

«Экология боюнча көйгөйлөр болбойт. Бардык тобокелдиктер эсептелген, коопсуздук стандарттары жүз пайыз сакталды», — деп билдирди ал.