Ысык-Көлдүн түштүк жээгинде, Тоң районунун Бөкөнбаев айылында 1-август күнү «Салбуурун» фестивалы өтөт. Бул тууралуу «Салбуурун» федерациясынан билдиришти.

Уюштуруучулардын айтымында, иш-чара маданий салттарды сактоого, аймактын туристтик дараметин өнүктүрүүгө жана жергиликтүү жамааттарды колдоого багытталган.

Конокторду кызыктуу программа күтөт: алгыр куштардын, тайган жана алабай сыяктуу аңчы жана кайтаруучу иттердин, кыргыз тукумундагы жылкылардын, «Арашан» породасындагы койлордун, аңчылык олжолорунун жана шаймандарынын, таш иштетүүчү чеберлердин буюмдарынын көргөзмөсү жана башка көптөгөн нерселер сунушталат. Мыкты бүркүтчүлөр, жаачылар жана каскадёрлор өз өнөрлөрүн көрсөтүшөт.

Фестивалдын маанилүү бөлүгү катары «Күрөш» улуттук күрөшүнүн чеберлеринин чыгуулары, ат үстүндөгү «Эр оодарыш» күрөшү, коноктор арасында жаа атуу боюнча мелдештер, жеңүүчүлөр үчүн байгелери бар бий жана ыр сынактары, ошондой эле алгыр куштар, жылкылар, төөлөр жана топоздор менен сүрөткө түшүү мүмкүнчүлүктөрү болот.

Мындан тышкары, көрүүчүлөр үчүн кыргыз аткаруучуларынын, көмөкөй ырчыларынын, доолбасчылардын жана фольклордук жамааттардын катышуусундагы концерттик программа тартууланат.