Мамлекет башчысынын басма сөз кызматы билдиргендей, Пакистан Ислам Республикасынын президенти Асиф Али Зардари президент Садыр Жапаровдун чакыруусу менен 6-9-июль күндөрү Кыргызстанга расмий сапар менен келет.

Маалыматка ылайык, сапардын алкагында Чолпон-Ата шаарында кеңейтилген курамда жогорку деңгээлдеги сүйлөшүүлөр өтөт.

Тараптар кыргыз-пакистан кызматташтыгынын негизги маселелерин, ошондой эле эл аралык уюмдардын, анын ичинде БУУ, ШКУ, ИКУ жана ЭКУнун алкагындагы өз ара байланыштарды талкуулашат.

Асиф Али Зардаринин расмий сапары Кыргызстан менен Пакистандын ортосундагы өнөктөштүктү жана достук мамилелерди мындан ары өнүктүрүүнүн маанилүү этабы болору белгиленет.