Кыргызстандын Жаратылыш ресурстары, экология жана техникалык көзөмөл министрлиги билдиргендей, 2026-жылдын биринчи жарым жылдыгында өлкөдө 160 рейддин жүрүшүндө суулардан 86 километрден ашык синтетикалык балык уулоочу тор алынып, 1,6 тоннадан ашык таштанды чыгарылды.

Мекеменин маалыматы боюнча, келтирилген зыяндын ордун толтуруу үчүн жалпысынан 953 миң 338 сомдук доо коюлуп, ал эми салынган административдик айып пулдардын суммасы 320 миң 500 сомду түздү.

Ысык-Көлдө 79 рейд жүргүзүлдү. Инспекторлор 34 миң 600 метр синтетикалык тор жана 905 килограмм таштанды алып чыгышты. 13 факты боюнча 869 миң 761 сом өлчөмүндө доо коюлуп, 18 факты боюнча 106 миң 500 сом айып пул салынды.

Токтогул суу сактагычында 51 рейд өткөрүлүп, анын жүрүшүндө 26 миң 300 метр синтетикалык тор жана 500 килограмм таштанды алынган. 78 миң 77 сомго доо коюлуп, 31 факты боюнча 205 миң сом айып пул салынган.

Мындан тышкары, Жаратылыш министрлигинин кызматкерлери Токтогул суу сактагычынан дагы 14 миң 200 метр синтетикалык тор алышкан.

Соң-Көлдө 18 рейд жүргүзүлүп, анын жүрүшүндө 8 миң 800 метр синтетикалык тор алынган.

Киров суу сактагычында 12 рейд жүргүзүлдү. Анда 2 миң 450 метр синтетикалык тор жана 250 килограмм таштанды алынган. Бир факты боюнча келтирилген зыяндын ордун толтуруу үчүн 5 миң 500 сом өлчөмүндө доо коюлуп, ошондой эле 9 миң сом өлчөмүндө административдик айып пул салынды.

Орто-Токой суу сактагычынан 200 метр синтетикалык балык уулоочу тор алынды.