21–27-сентябрь күндөрү Ысык-Көл облусунда театр сүрөтчүлөрүнүн эл аралык лабораториясы өткөрүлөт. Иш-чара Орусиянын Театр ишмерлеринин союзу тарабынан уюштурулууда.

Маданият министрлигинин маалыматында, бул лаборатория 30 жылдан ашык убакыттан бери Орусияда жыл сайын өткөрүлүп келет. Быйыл ал алгачкы жолу эл аралык форматта уюштурулуп, ага Кыргызстандын кесипкөй театр сүрөтчүлөрү катышат.

Программанын алкагында төмөнкүлөр каралган:

• тажрыйба алмашуу боюнча жолугушуулар жана автордук презентациялар;
• лекциялар жана мастер-класстар;
• театралдаштырылган перформанстар;
• Ысык-Көлдүн жаратылышында пленэрдик иштер.

Министрлик кыргызстандык адистерди лабораторияга активдүү катышууга чакырат. Катышуу шарттары жана арыз берүү тартиби боюнча толук маалымат Орусиянын Театр ишмерлеринин союзунун расмий сайтында (stdrf.ru) жайгаштырылган.