Президент Садыр Жапаров “Фейсбуктагы” баракчасы аркылуу кыргызстандыктарды коронавируска каршы эмдөөдөн өтүүгө дагы бир жолу чакырды.

Андагы билдирүүгө ылайык, бүгүн Кыргызстанда 69 адамдан COVID-19 илдети аныкталган.

“Ооругандардын 100 пайызы вакцина албагандар болуп чыкты. Вакцина алыңыздар”,- деп жазган мамлекет башчысы.

Республикалык штабдын маалыматына ылайык, Кыргызстанда акыркы бир суткада COVID-19 коронавирустук инфекциясына каршы 8 миң 284 адам (анын ичинен 3 миң 897 адам вакцинанын биринчи дозасын, 4 миң 387 жаран экинчи дозасын алды) эмдөөдөн өткөн. Ал эми өлкө боюнча жалпы 764 миң 437 адам вакцинанын биринчи компоненти менен, ал эми 565 миң 822 жаран экинчи компоненти менен эмделди.