Кыргызстандын президенти Садыр Жапаров 24-июлда Чолпон-Ата шаарында Кытай Эл Республикасынын тышкы иштер министри Ван Ини кабыл алды, деп билдирет президенттин администрациясынын басма сөз кызматы.

Маалыматка ылайык, жолугушуунун жүрүшүндө тараптар соода-экономикалык кызматташтыкты өнүктүрүү, биргелешкен инфраструктуралык долбоорлорду ишке ашыруу, транспорттук-логистикалык өз ара байланыш, айыл чарба тармагындагы өз ара аракеттенүү, маданий-гуманитардык кызматташуу маселелерин, ошондой эле эл аралык уюмдардын алкагында позицияларды координациялоону талкуулашты.

Жапаров кытай элин Кытай Коммунисттик партиясынын негизделгенинин 105 жылдыгы менен куттуктап, анын жетекчилиги астында КЭРдин олуттуу жетишкендиктерин белгиледи.

Ал Кыргызстан Кытайды негизги стратегиялык өнөктөштөрүнүн бири катары карай турганын жана эки мамлекеттин жана элдин кызыкчылыктарына төп келген өз ара пайдалуу кызматташтыкты мындан ары да өнүктүрүүнү ырааттуу түрдө жактай турганын баса белгиледи.

Мамлекет башчысы транспорт, инфраструктура, соода жана инвестиция тармагындагы биргелешкен долбоорлорду ишке ашыруу Кыргызстандын туруктуу экономикалык өнүгүүсү, жаңы жумуш орундарын түзүү жана жарандардын бакубаттуулугун жогорулатуу үчүн чоң мааниге ээ экенин белгиледи. Анын айтымында, республика инвесторлор үчүн жагымдуу шарттарды түзүүнү жана инвестициялык климатты жакшыртууну улантууда.

Ошол эле учурда Садыр Жапаров бардык чет өлкөлүк компаниялар, анын ичинде кытайлыктардын катышуусундагы ишканалар да Кыргызстандын мыйзамдарын кыйшаюусуз сактап, кыргыз элинин каада-салтын жана маданиятын сыйлап, ошондой эле өз ишмердүүлүгүн мыйзамдуулук жана айкындуулук принциптерине ылайык жүргүзүүгө тийиш экенин баса белгиледи.

Өз кезегинде Ван И Кытай Кыргызстанда жүргүзүлүп жаткан реформаларды жогору баалай турганын, алардын аркасында динамикалуу экономикалык өсүү жана калктын жашоо деңгээлин жогорулатуу камсыздалып жатканын белгиледи.

КЭРдин ТИМ башчысы кытай тараптын жогорку деңгээлде жетишилген макулдашууларды ишке ашырууга даярдыгын ырастап, ошондой эле Кыргызстандын 2027–2028-жылдарга БУУнун Коопсуздук Кеңешинин туруктуу эмес мүчөсү болуп шайланышы менен куттуктап, эл аралык аренада эки өлкөнүн өз ара аракеттенүүсү мындан ары да бекемделерине ишенимин билдирди.