Жогорку Кеңештин эл аралык иштер, коргоо, коопсуздук жана миграция боюнча комитети биринчи окууда Кыргызстан менен Япониянын ортосундагы кош салык салууну жоюу жана салык төлөөдөн качуунун алдын алуу тууралуу макулдашууну ратификациялоо боюнча мыйзам долбоорун колдоду. Документ 2025-жылдын 19-декабрында Токиодо кол коюлган.

Өкмөттүн баалоосуна ылайык, бул макулдашуу Кыргызстанды жапон инвесторлору үчүн жагымдуураак кылып, түз чет элдик инвестициялардын агымын көбөйтүүгө өбөлгө түзөт.

Экономика министрлигинин маалыматына караганда, Кыргызстан менен Япониянын ортосундагы товар жүгүртүү 2025-жылы 120,38 млн долларды түзүп, 2024-жылга салыштырмалуу 0,16% өскөн. Бирок соода түзүмү тең салмактуу эмес бойдон калууда: Япониядан импорт — 119,8 млн доллар, ал эми Кыргызстандан экспорт — болжол менен 0,6 млн доллар.

Импорттун негизин автоунаалар, автотетиктер, подшипниктер, электр жабдуулары, медициналык техника жана дары-дармектер, ошондой эле азык-түлүк товарлары түзөт. Ал эми Кыргызстан Японияга негизинен бал, жеңил өнөр жай продукцияларын, булгаары буюмдарын, кийим-кече жана бут кийимдерди экспорттойт.

Ошондой эле Кыргызстанда япон капиталы катышкан 33 компания катталгандыгы белгиленет. Салык кызматынын маалыматына ылайык, 2025-жылы алар бюджетке 6,7 млн сом салык төлөшкөн.