Блогер Батмакан Жолболдуева убактылуу кармоочу жайда тамырын кыркты. Бул тууралуу 24.kg агенттигине юрист Назгүл Сүйүнбаева билдирди.
Баткен облустук соту блоггерди камакта калтыруу боюнча мурунку инстанциянын чечимин күчүндө калтырган болчу.
«Менин кардарым орозо кармайт. Батмакан Жолболдуевага жакындарына тамак берүүгө тыюу салынган. Бир күн мурун Баткен облустук сотуна баш коргоо чарасы каралып жаткан жыйынга катышуу үчүн келдим. Айыпталуучу ИВСтин жетекчиси жана башка кызматкерлери тарабынан коркутуп-үркүтүүлөр жана куугунтуктоолорго даттанган. Жыйындан кийин райондук ички иштер бөлүмүнө барсак, жетекчилик жок экен. Убактылуу кармоочу жайдын жетекчиси менен жолуктук, биз кеткенден кийин Батмакан Жолболдуевага кысым көрсөтө баштады. Ал тамырын кести. Туугандары аны ооруканадан белгисиз тарапка алып кетишкенин айтышууда», — деди Назгүл Сүйүнбаева.
Маркум журналист Арзыгүл Галымбетова АКИpress агенттигинин Баткен облусу боюнча аймактык кабарчысы болуп иштеген. Мындан тышкары, ал чек ара маселелерин чагылдырып жүрчү. Журналист 26-мартта каза болгон. Өлөрүнө бир күн калганда ал фейсбук баракчасына блоггерлер Батма Бат менен Роза Маманова ага зыян келтирип, анын өлүшүн каалап жатышканын билдирген видеону жарыялаган.
Байкоосуздуктан адам өлүмүнө алып келген факты боюнча кылмыш иши козголгон. Иштин алкагында блогер Батмакан Жолболдуева кармалган.
