Жүрөгүнүн оор тубаса кемтиги бар төрт бала Түштүк Кореяда акысыз кардиохирургиялык операциядан өтүп, Кыргызстанга аман-эсен кайтып келишти.

Гуманитардык акция 2026-жылдын 29-майында Кыргыз Республикасынын Саламаттык сактоо министрлигине караштуу Жүрөк хирургиясы жана органдарды трансплантациялоо илимий-изилдөө институтунда балдарды акысыз диагностикалык кароодон өткөрүүдөн башталган. Текшерүүнү Инчхон шаарындагы Гиль ооруканасынан келген көчмө дарыгерлер тобу жүргүзгөн.

Диагностиканын жыйынтыгында түштүк кореялык адистер жүрөк оорусу бар 60 баланы текшерип, эң оор диагноз коюлган 9 бейтапты андан аркы дарылоо үчүн тандап алышкан. Оорулардын оордугун эске алуу менен Гиль ооруканасынын жетекчилиги алгач төрт баланы акысыз операцияга чакыруу чечимин кабыл алган.

«Милал» кардиохирургиялык фондунун, Инчхон шаарынын мэриясынын жана Гиль ооруканасынын колдоосу менен 2026-жылдын 7-июлунда төрт бала энелери менен кошо Түштүк Кореяга учуп кетишкен. Бейтаптарга карынчалар аралык тосмонун кемтиги, Фаллонун тетрадасы жана жүрөктүн башка оор тубаса кемтиктери диагнозу коюлган.

Түштүк кореялык хирургдар бардык операцияларды ийгиликтүү өткөрүштү. Операциядан кийинки мезгил эч кандай татаалдашуусуз өтүп, реабилитациядан соң балдар канааттандырарлык абалда ооруканадан чыгарылган.

2026-жылдын 29-июлунда кичинекей бейтаптар энелери менен бирге Бишкекке аман-эсен кайтып келишти.