Улуттук коопсуздук мамлекеттик комитетинин басма сөз кызматы билдиргендей, ири өлчөмдө пара талап кылууга шектелип, КР Суу ресурстары, айыл чарба жана кайра иштетүү өнөр жайы министрлигине караштуу Жер жана суу көзөмөлү боюнча кызматынын кызмат адамдары кармалды.

Мекеменин маалыматына ылайык, аталган министрликке караштуу Жер жана суу көзөмөлү боюнча кызматтын Чүй-Бишкек аймактар аралык башкармалыгынын чиновниктери суу коргоо аймагына жакын жерде туристтик объектти куруу долбоорун макулдашып берүү үчүн 1 миллион сом опузалап талап кылышкан.

2026-жылдын 7-июлунда КР Кылмыш-жаза кодексинин 343-беренесинин 1-бөлүгүнө («Пара талап кылуу») ылайык козголгон кылмыш ишинин алкагында, башкармалыктын жетекчиси жана башкы инспектору пара алып жаткан жеринен (кылмыш үстүнөн) кармалышты.

Башкармалыктын жетекчиси КР УКМКнын убактылуу кармоочу жайына (УКЖ) киргизилди. Тергөө амалдары жүрүп жатат.