Кыргыз-кытай бизнес-форумунда сүйлөп жатып, КРдин Соода-өнөр жай палатасынын башчысы Темир Сариев кытайлык ишкерлерге амбициялуу максатты — жакынкы эки-үч жылдын ичинде республикада биргелешкен күч менен жүз жогорку технологиялуу ишкана түзүүнү сунуштады.

Анын айтымында, жөн гана чийки зат сатуудан өлкө ичиндеги реалдуу өндүрүшкө өтүүгө, алдыңкы технологиялар менен бирге инвестицияларды тартууга убакыт келди.

Сариев Кыргызстан өзүнүн ички рыногу менен гана эмес, Борбор Азиядагы негизги логистикалык түйүн катары да жагымдуу экенин, ЕАЭБ жана ЕБ базарларына жол ачарын, өзгөчө Кытай — Кыргызстан — Өзбекстан темир жолунун курулушунун башталышын эске алуу менен баса белгиледи. Ал артыкчылыктуу багыттар катары жашыл энергетиканы, органикалык айыл чарбасын, машина курууну, санариптик технологияларды жана жасалма интеллектти атады.

Мындан тышкары, Соода-өнөр жай палатасынын жетекчиси өздүк инженердик кадрларды даярдоо үчүн КЭРдин жогорку окуу жайларында кыргызстандык студенттердин билим алуусуна берилген квоталарды бир нече эсеге көбөйтүү зарылдыгын көрсөттү.

Бул пландарды иш жүзүндө ишке ашыруу үчүн Темир Сариев Соода-өнөр жай палатасынын алдында атайын Кыргыз-кытай өнөр жай кооперация борборун түзүүнү сунуштады. Бул уюм ишенимдүү өнөктөштөрдү издөө, инвесторлорду коштоо жана долбоорлорду өндүрүштү реалдуу ишке киргизүүгө чейин жеткирүү милдетин өзүнө алат. Палатанын башчысы ийгиликтин негизги критерийи катары кол коюлган меморандумдарды эмес, «Биргелешип өндүрүлгөн» деген белгиси бар реалдуу ачылган биргелешкен ишканалардын санын атады.