Бишкекте авиабилет сатуудагы алдамчылыкка шектелген аял кармалды. Алдын ала маалыматтар боюнча, келтирилген чыгым 2,1 млн сомдон ашты. Бул тууралуу Бишкек ШИИББдин басма сөз кызматы билдирди.

Маалыматка ылайык, 4-августта Бишкектин Биринчи Май РИИБине 25тен ашык жаран кайрылып, авиабилет сатып алууда алдамчылыктын курмандыгы болгонун билдиришкен.

Такталгандай, С.Н. аттуу жаран авиабилеттерди даярдап берүү шылтоосу менен арыз ээлеринин ар биринен акча алып, бирок өз милдеттерин аткарган эмес.

Бул факт боюнча КР Кылмыш-жаза кодексинин 209-беренеси («Алдамчылык») менен кылмыш иши козголду. Шектүү Бишкек ШИИББдин убактылуу кармоочу жайына киргизилди.

Тергөө иштери уланууда.

Буга чейин Кыргызстандын ITF таэквондо боюнча улуттук курама командасы Алматы — Пекин — Улан-Батор рейси менен Монголияда өтө турган Азия чемпионатына уча албай калганы кабарланган. Буга федерация тарабынан төлөнгөн авиабилеттердин иш жүзүндө сатып алынбай калышы себеп болгон.