Дүйнө жүзү боюнча жүз миңдеген адамдар адам сатуунун курмандыгы болуп, коркутуу жана зомбулук аркылуу интернет-алдамчылыкка катышууга мажбурланууда. Бул тууралуу Эл аралык миграция уюму (ЭМУ) 30-июлда белгиленүүчү Адам сатууга каршы күрөшүүнүн бүткүл дүйнөлүк күнүнүн алдында билдирди.

Уюмдун маалыматына ылайык, кылмыштуу топтор адамдарды чет өлкөдөгү жасалма жумуш сунуштары аркылуу алдап чакырышат. Барган соң алардын документтери тартып алынып, кайтарылган жайларда кармалып, зомбулук, коркутуу жана жасалма карыздар аркылуу интернет-алдамчылык схемаларына катышууга мажбурланышат.

ЭМУнун башкы директору Эми Поуп мындай адамдар кылмышкерлер эмес, адам сатуунун курмандыктары экенин белгиледи.

«Аларды зомбулук жана коркутуу жолу менен кылмыш жасоого мажбурлашат. Алар жазалоого эмес, коргоого татыктуу», — деди ал.

БУУнун Баңгизаттар жана кылмыштуулук боюнча башкармалыгынын маалыматына ылайык, 2025-жылы Чыгыш жана Түштүк-Чыгыш Азияда, ошондой эле Австралия менен Жаңы Зеландияда интернет-алдамчылыктан келтирилген зыяндын көлөмү 88,3 миллиарддан 114,1 миллиард долларга чейин жеткен.

Бул көрүнүшкө каршы күрөшүү максатында ЭМУ 2026–2030-жылдарга карата Азия-Тынч океан аймагы үчүн жаңы аймактык стратегиясын сунуштады. Документте жабырлануучуларды коргоону күчөтүү, алдын алуу иштерин жүргүзүү, мамлекеттер аралык кызматташтыкты кеңейтүү жана кылмыштуу тармактарга каршы күрөштү күчөтүү каралган.

2022–2025-жылдары ЭМУ Индонезия, Индия, Шри-Ланка, Эфиопия, Кения жана Бангладеш баш болгон 39 өлкөдөн чыккан адам сатуунун 3,5 миңден ашуун курмандыгына жардам көрсөткөн.

Уюмдун белгилешинче, жабырлануучуларды бошотуу – бул биринчи гана кадам. Алардын көбү оор психологиялык жаракатка, коомдук басмырлоого, документтеринин жоктугуна жана кылмыш жоопкерчилигине тартылып калуудан коркуу көйгөйлөрүнө туш болушат. ЭМУ аларга коргоо алып берүү, мекенине коопсуз кайтып келүүсүнө жана коомго кайра аралашуусуна көмөк көрсөтөт.