Ак-Буурага 14 күн мурун автоунаа менен кошо түшүп кеткен 4 жашар баланын жансыз денеси табылды.  Бул тууралуу Өзгөчө кырдаалдар министрлигинин басма сөз кызматынан билдиришти.

Маалыматка ылайык, 14-сентябрь күнү кечинде Ноокат районунда Ак-Терек-Папан-Кожокелен унаа жолунун 40-чакырымында “Хюндай-Портер” үлгүсүндөгү унаанын айдоочусу рулду башкара албай Ак-Буура дарыясына түшүп кеткен.

Унаадагы 3 адамдын ичинен бирөөсү; 46 жаштагы киши аман калып, жолдо бараткан унаанын жардамында Ош облустук ооруканасына жеткирилген. Ал эми калган 2 адам, 64 жаштагы киши жана 4 жашар бала сууга агып кеткен.

14 күнгө созулган издөө иш чараларанын алкагында кечээ, 27-сентябрда 4 жашар баланын жансыз денеси табылып, туугандарына өткөрүлүп берилген.