АКШнын мамлекеттик катчысы Марко Рубио дүйнө жүзүндөгү Америка элчиликтерине өздөрү жайгашкан өлкөлөрдүн өкмөттөрүнө жогорку деңгээлде кайрылып, Иран менен соода байланыштарын үзүүнү талап кылууну тапшырды. Бул тууралуу Axios басылмасы өз булактарына таянуу менен билдирет.

Басылманын маалыматына ылайык, тиешелүү көрсөтмө ушул аптанын башында «Экономикалык изгой» операциясынын алкагында жөнөтүлгөн.

Америкалык дипломатиялык өкүлчүлүктөргө кабыл алуучу өлкөлөрдүн бийликтеринен Иран менен соода мамилелерин «дароо жана системалуу түрдө» токтотууну, ошондой эле Тегеран менен байланышкан мыйзамсыз ишкердикти аныктоону талап кылуу тапшырмасы берилди.

АКШнын дипломатиялык демаршында Иран менен бизнести уланта берген өлкөлөр, компаниялар жана жеке адамдар америкалык санкцияларга кабылып, доллар системасына кирүү мүмкүнчүлүгүнөн ажырап калуу коркунучунда турганы баса белгиленет.

Америкалык аткаминерлердин бири Axios басылмасына билдиргендей, өзүнчө көрсөтмөлөр Абу-Даби, Маскат, Гонконг, Доха, Лондон, Берлиндеги АКШ элчиликтерине, ошондой эле Борбордук Азия өлкөлөрүнүн бир нече борбор калааларына жөнөтүлгөн.

Дипломаттарга, өзгөчө, өкмөттөрдөн Ирандын Melli жана Saderat банктарынын бардык филиалдарын жабууну талап кылуу тапшырылды. Америкалык тараптын маалыматына ылайык, бул банктар Ислам революциясынын сакчылар корпусу (ИРСК) менен байланыштуу.

Мындан тышкары, АКШнын президенти Дональд Трамптын администрациясы Иранга экономикалык басым көрсөтүү өнөктүгүнүн алкагында чараларды ишке ашырууну координациялай турган жана режимдин сакталышын көзөмөлдөй турган ведомстволор аралык жумушчу топту түзүү үстүндө иштеп жатат, деп билдирди америкалык аткаминер.