Акыйкатчы (Омбудсмен) институту 14-июлда ЖАМКтын №27 мекемесинде жүргүзүлгөн мониторингдин жыйынтыгы боюнча чогултулган материалдарды Башкы прокуратурага жөнөттү.

Текшерүү учурунда Кыйноолордун алдын алуу борборунун кызматкерлери соттолгондор менен маектешкен. Алардын экөө мекеменин кызматкерлери тарабынан адамдык ар-намысын кемсинткен мамиле жана моралдык-психологиялык басым көрсөтүлүп жатканын билдиришкен.

Соттолгондордун бири кан басымы кескин жогорулаганына карабастан, аны тартиптик изоляторго (ШИЗО) киргизишкенин айткан. ШИЗОнун камерасын кароо учурунда Акыйкатчы институтунун өкүлдөрү темир керебеттин бузук абалда экенин жана санитардык абалы боюнча кемчиликтерди аныкташкан. Институттун маалыматына ылайык, текшерүүдөн кийин мекеменин администрациясы керебеттин кемчилигин дароо жойгон.

Экинчи соттолгон буту ооруп жүргөндүктөн чуркай албай жатканын билдирген. Анын айтымында, бул маселе боюнча ал мекеменин медициналык бөлүмүнө кайрылган.

Экөө тең Акыйкатчы Жамиля Жаманбаевага жазуу жүзүндө кайрылып, №27 мекеменин кызматкерлерине карата текшерүү жүргүзүп, жоопкерчиликке тартууга көмөктөшүүнү өтүнүшкөн.

Мекеменин администрациясынын маалыматына караганда, соттолгондордун бири ички тартипти бир нече жолу бузгандыгы үчүн 9-июлда ШИЗОго киргизилип, 15-июлда кадимки камерага чыгарылган.

Мониторингдин жүрүшүндө институттун кызматкерлери ашкананы жана медициналык бөлүмдү да текшеришкен. Медицина кызматкерлеринин айтымында, соттолгондорго өз убагында зарыл медициналык жардам көрсөтүлөт.

Текшерүүнүн материалдары жана соттолгондордун арыздары Кыргыз Республикасынын Башкы прокуратурасына жөнөтүлдү.