Кыргызстандыктарга президент Садыр Жапаровдун атынан Эгемендүүлүк күнүнө карата 5 миң сомдон акчалай жардам берилет деп соцтармактарга тарап жаткан маалымат чындыкка дал келбейт. Бул тууралуу президенттин басма сөз катчысы Аскат Алагозов билдирди.

Анын айтымында, бул билдирүү мамлекет башчысынын атын пайдалануу менен пайда табууну көздөгөн адамдардын аракети болуп саналат.

"Мамлекет башчысынын атынан мындай төлөмдөр жарыяланган эмес. Тексти коштогон шилтеме расмий мамлекеттик ресурс болуп саналбайт",- деп билдирди Алагозов.

Ошондой эле ал учурда тийиштүү органдар аталган жалган маалымат боюнча иш алып барып жатканын айтты.

"Жарандарды жалган маалыматтарга ишенбөөгө жана белгисиз күмөндүү шилтемелер аркылуу жеке маалыматтарын киргизбөөгө чакырабыз",- деди басма сөз катчы.