Кыргызстанда ДЦП менен ооруган балдарды реабилитациялоого бөлүнгөн квоталарды, анын ичинде жай мезгилинде да көбөйтүү зарыл. Бул тууралуу Жогорку Кеңештин депутаты Нилуфар Алимжанова ДЦП менен ооруган балдардын ата-энелери менен болгон жолугушуудан кийин билдирди.

Анын айтымында, жолугушууда ата-энелер балдарды реабилитациялоого байланышкан бир катар олуттуу көйгөйлөрдү көтөрүшкөн. Тактап айтканда, көптөгөн реабилитациялык борборлор ДЦПнын оор формасы менен ооруган балдарды кабыл албайт.

Мындан тышкары, адистердин жетишсиздиги жана узун кезектер көйгөй жаратууда. Алимжанованын айтымында, «Алтын балалык» жана «Келечек» борборлорунда тиешелүү шарттар бар, бирок бул борборлордо да кезек көп.

Ата-энелер жай мезгилиндеги реабилитация маселесине да өзгөчө көңүл бурушкан. Депутаттын айтымында, «Алтын балалык» борбору жайында ДЦП менен ооруган балдарды реабилитацияга кабыл албайт. Аларды көбүнчө күзүндө же кышында, борбордо балдар аз болгон учурда кабыл алышат.

«Ата-энелер квотаны көбөйтүп берүүнү суранышты. ДЦП менен жашаган балдар жай мезгилинде да башка балдар менен бирге болуп, реабилитациядан өтүп, коомго аралашуусу керек», — деди Алимжанова.

Депутат бул маселеге көңүл буруп, ДЦП менен ооруган балдарды реабилитациялоого бөлүнгөн квоталарды көбөйтүү мүмкүнчүлүгүн карап чыгууну суранды.