Президент Садыр Жапаровдун тапшырмасы менен Баткен облусунун Зардалы айылында заманбап үйлөр курулат. Бул тууралуу Президенттик администрациянын маалыматтык саясат кызматынын жетекчиси Дайырбек Орунбеков билдирди.

Анын айтымында, аталган долбоорду ишке ашыруу үчүн президенттин иш башкаруучусу Каныбек Туманбаев аталган аймакка жөнөтүлгөн.

Белгилей кетсек, буга чейин Зардалы айылына электр энергиясы берилип, мобилдик байланыш жана интернет туташтырылган. Ошондой эле айылга алып баруучу унаа жолу курулган.

Орунбеков белгилегендей, мурда жол жоктугунан тургундар тийиштүү шарттары жок, таш жана ылайдан салынган үйлөрдө жашап келишкен. Мындан улам айылга заманбап үйлөрдү салуу тапшырмасы берилген.