Кыргызстанда 2026-жылы 19,6 млрд кВт·саат электр энергиясы керектелери күтүлүүдө, анын 4,1 млрд кВт·саатын импорттоо пландалууда. Мындай маалымат Министрлер кабинетинин төрагасы Адылбек Касымалиевдин жетекчилиги астында өткөн 2026–2027-жылдардагы жылытуу мезгилине даярдык боюнча кеңешменин жыйынтыгында айтылды.

Берилген маалыматка ылайык, өлкө ичинде 15,5 млрд кВт·саат электр энергиясын иштеп чыгуу пландаштырылууда. Импорт суу ресурстарын сактоо жана аларды сарамжалдуу пайдалануу үчүн зарыл.

Буга байланыштуу Касымалиев Энергетика министрлигине, энергетикалык ишканаларга жана жергиликтүү өз алдынча башкаруу органдарына электр энергиясын керектөөнүн белгиленген лимиттеринин сакталышына көзөмөлдү күчөтүүнү тапшырды.

Ошондой эле алдыдагы жылытуу мезгилинде калк арасында электр энергиясын үнөмдөө зарылдыгы тууралуу түшүндүрүү иштерин жүргүзүү тапшырылды.

Кеңешмеде жылуулук менен камсыздоочу ишканалардын, бюджеттик мекемелердин даярдыгы жана калкты отун менен камсыздоо маселелери да талкууланды. Маалыматтарга ылайык, бюджеттик мекемелер үчүн 319,4 миң тонна көмүр даярдалышы керек. Калктын көмүргө болгон жылдык муктаждыгы 1 млн 483,63 миң тоннаны түзөт.

Отун базаларында көмүр бар экенине карабастан, калк аны азырынча жетиштүү деңгээлде активдүү сатып албай жатканы белгиленди.

Тармактык мекемелерге жарандар көмүрдү керектүү көлөмдө жана жеткиликтүү баада алдын ала сатып ала алышы үчүн шарттарды түзүү тапшырылды.

Министрлер кабинетинин маалыматы боюнча, Бишкек жана Ош шаарларынын ЖЭБдерин (жылуулук электр борборлорун) отун менен камсыздоо планга ылайык жүрүп жатат.

Жыйындын жүрүшүндө Энергетика министрлигинин, Бишкек жана Ош мэрияларынын, министрлик жана ведомство жетекчилеринин, ошондой эле президенттин облустардагы ыйгарым укуктуу өкүлдөрүнүн отчёттору угулду.

Энергетикалык объекттерди оңдоо, жылуулук менен камсыздоочу ишканаларды каржылоо жана бюджеттик мекемелерди кышка даярдоо маселелери каралды.

Кеңешменин жыйынтыгы боюнча Касымалиев бардык даярдык иштерин белгиленген мөөнөттө бүтүрүүнү тапшырды.

Ал жылытуу мезгилин туруктуу өткөрүү үчүн министрлердин, аймак башчыларынын, мэрлердин, акимдердин, муниципалдык ишканалардын жана энергетикалык компаниялардын жетекчилеринин жеке жоопкерчилиги бар экенин баса белгиледи.