Президенттин басма сөз катчысы Аскат Алагозов 1-сентябрь Бишкек шаарындагы мамлекеттик жана муниципалдык мекемелердин кызматкерлери үчүн эмгек акысы сакталуу менен эс алуу күнү деп жарыяланарын билдирди.

Анын айтымында, борбор калаанын аймагында иштеген жеке компанияларга жана ишканаларга да ушундай эле сунуш жөнөтүлдү.

Алагозов белгилегендей, Министрлер кабинетинин тийиштүү токтому президент Садыр Жапаровдун Кыргызстандын айрым аймактарында кошумча эс алуу күндөрүн белгилөө маселесин убактылуу укуктук жөнгө салууну киргизүү жөнүндө жарлыгын аткаруу үчүн кабыл алынган.

Мындан тышкары, президент Министрлер кабинетинин төрагасы Адылбек Касымалиевдин жетекчилиги астындагы Кыргызстандын көз карандысыздыгынын 35 жылдыгын белгилөөгө даярдык көрүү боюнча уюштуруу комитетине 31-августта өлкөнүн бардык аймактарында концерттик-зоок иш-чараларын өткөрүүнү, ошондой эле жарандарга эс алуу жайларына барууда жеңилдиктерди берүү мүмкүнчүлүгүн карап чыгууну тапшырды.

Мамлекет башчысынын басма сөз катчысы ошондой эле 31-августта «Бишкек Арена» стадионунда мамлекет башчыларынын катышуусунда Дүйнөлүк көчмөндөр оюндарынын ачылыш аземи гана өтөрүн, анда командалардын парады жана чакан концерттик программа болорун түшүндүрдү.

«Бишкек Аренанын» өлкө тургундарынын катышуусу менен өтүүчү расмий ачылышы сентябрь айынын аягына чейин болот. Анда эстрада жылдыздарынын катышуусу менен масштабдуу майрамдык иш-чара жана концерттик программа өткөрүү пландалууда.

31-августта «Бишкек Арена» стадионунда Дүйнөлүк көчмөндөр оюндарынын ачылыш аземи өтөт

Аскат Алагозов

Кыргыз Республикасынын Президентинин басма сөз катчысы