Президент Садыр Жапаров Кыргызстандын айрым аймактарында кошумча эс алуу күндөрүн киргизүү мүмкүнчүлүгүн караган жарлыкка кол койду.

Документке ылайык, убактылуу чара 2026-жылдын 15-июлунан 2027-жылдын 1-июлуна чейин күчүндө болот. Бул мезгилде Министрлер кабинети жергиликтүү өз алдынча башкаруу органдары менен макулдашуу боюнча, орточо күндүк эмгек акысын сактоо менен бир же бир нече кошумча эс алуу күндөрүн белгилей алат.

Мындай эс алуу күндөрү эл аралык же ири мамлекеттик иш-чараларды өткөрүү зарылдыгы келип чыкканда, ошондой эле ыкчам чечимди талап кылган башка өзгөчө жагдайларда киргизилиши мүмкүн.

Бул механизм ийгиликтүү ишке ашса, убактылуу чара туруктуу негизде бекитилиши мүмкүн. Эксперименттин алгачкы жыйынтыктарын 2027-жылдын февраль айынын аягында чыгаруу пландалууда.

Белгиленгендей, кошумча эс алуу күндөрүн киргизүү мүмкүнчүлүгү, атап айтканда, сентябрь айынын башында Кыргызстанда өтө турган ШКУнун (Шанхай кызматташтык уюму) саммити жана Дүйнөлүк көчмөндөр оюндары учурунда колдонулушу мүмкүн.