Кыргызстанда жашы жете электерге ата-энесинин биринин коштоосунда, экинчисинин милдеттүү макулдугусуз эле чет өлкөгө чыгууга уруксат берүү сунушталууда. Бул демилге тууралуу Жогорку Кеңештин депутаты Дастан Бекешев билдирди.

Анын айтымында, тиешелүү демилге Юстиция министрлигинде турат жана анын сунушу менен чогуу каралышы керек.

Бекешев колдонуудагы талаптар бир жагынан балдардын чет өлкөгө көзөмөлсүз чыгарылып кетишине жол бербөөгө багытталганын, бирок экинчи жагынан ажырашкандан кийин ата-энелер үчүн көйгөйлөрдү жаратып жатканын белгиледи.

«Айрым абийирсиз жарандар ажырашкандан кийин муну кыянаттык менен пайдаланып, манипуляция кыла башташат. Алар жубайын, мурдагы жубайын: "Уруксат беремби же жокпу, сен тигини же муну кылышың керек, же алимент алуу үчүн сотко кайрылбашың керек" деп шантаж кылган учурлар болот», — деди депутат.

Анын айтымында, жашы жете элек баланын экинчи ата-энесинин макулдугусуз атасынын же энесинин бирөөсү менен чет өлкөгө чыгуу мүмкүнчүлүгү тууралуу маселени бүгүн кароо пландалууда.