Баткен облустук биргелешкен ооруканасына коюлган делген жардыруучу зат тууралуу маалымат тастыкталган жок. Бул тууралуу Reporter.kg сайтына Баткен ОИИБдин басма сөз кызматынан билдиришти.

Мекеменин маалыматына ылайык, 4-июль күнү жардыруучу зат коюлгандыгы тууралуу билдирүү түшкөндөн кийин, маалымат ошол замат маалыматтарды каттоо электрондук журналына катталган.

«Окуя болгон жерге ыкчам-тергөө тобу жана тиешелүү кызматтар барышты. Текшерүүнүн жүрүшүндө зарыл болгон кароо жана текшерүү иш-чаралары жүргүзүлдү. Анын жыйынтыгы менен жардыруучу зат коюлганы тууралуу маалымат тастыкталган жок», — деп билдиришти Баткен облустук ички иштер башкармалыгынан.