Маданият министрлигинин колдоосу менен Кыргызстанда «Nomad Express: Музыка, маданият, мода жана салттар аркылуу саякат» маданий долбоору башталды. Reporter.kg кабарчысы билдиргендей, Бишкек — Балыкчы поездинин жүргүнчүлөрүнө жолдо баратып эле этно-көрсөтүү уюштурулду.

Каттамдын алгачкы жүргүнчүлөрү жана чакырылган коноктор өзгөчө окуянын катышуучусу болушту: сапар учурунда поезддин ичи импровизацияланган подиумга айландырылып, анда улуттук салттарды заманбап өңүттө чагылдырган кыргыз дизайнери Айпери Обозованын этно-коллекциясы көрсөтүлдү.

Белгилей кетсек, маданият, искусство, мода индустриясы, медиа жана чыгармачыл коомчулуктун өкүлдөрүн маданий саякатка бириктирген долбоордун автору жана идеялык демилгечиси — Кыргыз Республикасынын маданиятынын мыктысы Олеся Семикоз.

Долбоордун негизги максаты — Кыргызстандын улуттук маданиятын жайылтуу, салттуу өнөрдү сактоо жана алдыга жылдыруу, ошондой эле өлкөнүн артисттеринин, музыканттарынын, дизайнерлеринин жана маданият тармагынын өкүлдөрүнүн ортосундагы чыгармачылык байланышты өнүктүрүү.

Долбоордун алкагында Кыргыз Республикасынын VI Дүйнөлүк көчмөндөр оюндарына даярдыгына өзгөчө көңүл бурулат. Катышуучулар үчүн алдыдагы Оюндарга жана өлкөнүн маданий-туристтик потенциалына арналган атайын презентациялык программа уюштурулат.

Ошондой эле катышуучулар Балыкчы шаарынын жаңы объектилери жана жаңыланган инфраструктурасы менен таанышышат.

«Nomad Express» долбоору өлкөнүн маданий мурасынын байлыгын жана көп түрдүүлүгүн көрсөтүү менен, маданий алмашуунун, чыгармачылык кызматташтыктын жана Кыргызстандын заманбап маданий мейкиндигин алдыга жылдыруунун аянтчасы болуп калмакчы.