Бишкек шаардык ички иштер башкы башкармалыгы (ШИИББ) экономикалык кылмыштарга каршы күрөшүү боюнча кызматтын мурдагы жетекчиси Сыймык Жапыкеевдин кармалышы тууралуу Reporter.kg басылмасынын суроосуна жооп берди. Мекеменин маалыматына караганда, эркек киши Жаманбаев көчөсүндөгү батирде ызы-чуу болуп жатканы тууралуу арыздан кийин милицияга жеткирилген.

ШИИББдин маалыматы боюнча, 19-октябрда саат 02:11 чамасында «102» номерине тынчтыкты бузуу тууралуу билдирүү түшкөн. Арыздануучу кошуналары ызы-чуу салып, кыйкырып, жашоочулардын тынчтыгын бузуп жатканын билдирген. Бул факт Биринчи май райондук ички иштер башкармалыгынын Маалыматтарды каттоо журналына (МКЖ) катталып, тергөөгө чейинки текшерүү башталган.

Окуя болгон жерге милиция кызматкерлери дароо жөнөп кетишкен. ШИИББдин маалыматына ылайык, алар барганда 1977-жылы туулган С. Ж. аттуу жаран катуу алкоголдук мас абалда болуп, милиция кызматкерлеринин мыйзамдуу талаптарына баш ийбей, сөгүнгөн. Кийин ал Биринчи май райондук ички иштер башкармалыгынын № 5 шаардык милиция бөлүмүнө жеткирилген. Учурда бул факт боюнча териштирүү жүрүп жатат. Жоопто эркек кишинин толук аты-жөнү көрсөтүлгөн эмес.

Буга чейин Жапыкеев 18-октябрда кармалганын билдирген. Анын айтымында, ыкчам топ аны үйүнөн алып кеткендиктен, ал милиция бөлүмүнө үй тапочкасы менен барган. Ал шаардык милиция бөлүмүндө (ШМБ) сегиз саат бою кармалганынын себеби түшүндүрүлбөгөнүн, ага арыз түшкөнүн жана ички иштер министри ойгонгонго чейин күтүшү керектигин гана айтышканын билдирген.