Бишкекте алдамчылыкка шектелген жаран кармалды. Бул тууралуу Ленин райондук милициясынын маалымат кызматы билдирди.

Маалым болгондой, 2023-жылы 15-декабрда милицияга аял киши арыз менен кайрылган. Ал билдиргендей, 5-ноябрда Т.К. аттуу жаран карызга 20 миң доллар акча берем деп, батирин күрөөгө алган. Ошол эле учурда батирди сатуу-сатып алуу келишимин түзүп, күрөөгө коюлган батирди кайтарып берүүдөн баш тарткан. Ошентип батирге ээлик кылып алган.

Бул факт боюнча Кылмыш-жаза кодексинин 209-беренесине (алдамчылык) ылайык кылмыш иши козголгон.

Милиция шектүү катары 21-мартта 28 жаштагы Т.К. аттуу жаранды кармады. Соттун чечими менен ал тергөө аяктаганча 4-апрелге чейин камакка алынган.

Иликтөө иштери уланууда.