Кыргызстанда жогорку окуу жайларына документтерди кабыл алуунун үчүнчү этабы расмий түрдө башталды. Абитуриенттер 29-июль саат 14:00гө чейин арыз тапшыра алышат.

Агартуу министрлигинин маалыматы боюнча, кабыл алуу өнөктүгүнүн алгачкы эки этабында тапшыруучулар 61 миңден ашык арыз беришкен. Анын ичинен 21,6 миңи — мамлекеттик бюджеттин эсебинен, дагы 39,5 миңи — контракттык негизде билим алууга багытталган.

Арыздарды кароонун жыйынтыгы менен ЖОЖдор 41,6 миң абитуриент боюнча оң чечим кабыл алды.

Сунушталган багыттарды 30 миңден ашуун адам биротоло тандап алды. Алардын ичинен 23,7 миңи окуунун контракттык формасына, дагы 6,4 миңи гранттык орундарга кабыл алынды.

Тапшыруучулардын арасында педагогикалык жана гуманитардык адистиктер, экономика, финансы жана бизнес, саламаттыкты сактоо жана медицина, маалыматтык технологиялар, ошондой эле юриспруденция багыттары эң чоң суроо-талапка ээ болууда.