Бишкекте 10 жашар баланы сүзүп, өлүмүнө себепкер болгон муниципалдык автобустун айдоочусу 2026-жылдын январь айында эле айдоочулук күбөлүгүнөн ажыратылган, бирок ал бул фактыны иш берүүчүдөн жашырып, жүргүнчүлөрдү ташууну уланта берген. Бул тууралуу Бишкек шаарынын мэри Айбек Жунушалиев адам өлүмү менен коштолгон жол кырсыгынан кийин өткөргөн чукул кеңешмеде белгилүү болду.

Мэриянын маалыматы боюнча, айдоочу 2023-жылдын сентябрь айында жарактуу айдоочулук күбөлүгү менен жумушка алынган. Бирок мас абалында унаа башкарганы үчүн күбөлүгүнөн ажыратылгандан кийин, ал бул тууралуу иш берүүчүгө кабарлаган эмес жана ички текшерүүлөр учурунда айдоочулук күбөлүгүнүн жасалма көчүрмөсүн көрсөтүп келген.

Мындан тышкары, сотто иш каралып жатканда ал киши убактылуу иштебей турганын көрсөткөн, ошондуктан анын унаа башкаруу укугунан ажыратылганы тууралуу маалымат муниципалдык ишканага түшкөн эмес.

Кеңешменин жыйынтыгы менен үч күндүн ичинде кызматтык иликтөө жүргүзүү, окуянын себептерин аныктоо жана жооптуу адамдардын чөйрөсүн белгилөө тапшырылды. Текшерүүнүн материалдары укук коргоо органдарына өткөрүлүп берилет, ал эми күнөөлүү деп табылгандар кызматтан бошотууга чейинки жоопкерчиликке тартылышат.

Жол кырсыгы 13-июль күнү эртең менен Рыскулов көчөсү менен Жаш Гвардия бульварынын кесилишинде болгон. №34 автобустун айдоочусу жөө жүргүнчүлөр өтмөгүнөн өтүп бара жаткан баланы сүзүп кеткен. Бала жандандыруу бөлүмүндө каза болду. Кырсык фактысы боюнча кылмыш иши козголуп, айдоочу кармалды.