Бишкек ИИББдин кызматкерлери жасалма визаларды даярдоо жана сатуу аркылуу мыйзамсыз миграция каналын уюштурууга шектелген жаранды кармашты. Бул тууралуу ИИББдин басма сөз кызматы билдирди.

Мекеменин маалыматы боюнча, Экстремизмге жана мыйзамсыз миграцияга каршы аракеттенүү кызматына чет өлкөлүк жаран арыз менен кайрылган. Ал өзүнүн мекендеши акчалай сый акы үчүн жасалма жумушчу жана окуу визаларын даярдап сатып, мыйзамсыз миграция каналын уюштурганын билдирген.

Тергөөнүн маалыматы боюнча, чет өлкөлүктөр бул документтерди Кыргызстанга аба транспорту аркылуу келүү үчүн колдонушкан. Бирок визалардын жараксыз экени аныкталгандан кийин, алардын бир бөлүгү мекенине кайтууга мажбур болгон, ал эми айрымдарын чек арачылар документтери жасалма экенин байкап, өлкөгө киргизбей коюшкан.

Бул факт боюнча КР Кылмыш-жаза кодексинин 168-беренеси («Мыйзамсыз миграцияны уюштуруу, мигранттарды мыйзамсыз ташып кирүү (ташып чыгуу)») менен кылмыш иши козголгон.

Шектүү июль айынын башында башка адамдар менен биргеликте арыз ээсине мыйзамдуу студенттик виза алып берүүнү убада кылганы аныкталган. Ал өз кызматы үчүн 1 миң АКШ долларын алып, андан соң Кыргызстандын студенттик визасына окшош, бирок тергөөнүн версиясы боюнча, жасалма белгилери бар документти өткөрүп берген.

Алдын ала маалыматтарга караганда, шектелүүчү жана анын шериктери чет мамлекеттердин биринин кеминде 200 жаранынын Кыргызстанга мыйзамсыз кирүүсүнө, ошондой эле 30дан ашык чет өлкөлүктүн өлкөдө мыйзамсыз жүрүүсүнө шарт түзүшкөн. Кылмышкерлер документтерди жасап бергендиги үчүн ар бир кардардан 1 миң доллардан алышкан. Материалдык чыгымдын болжолдуу суммасы кеминде 30 миң доллар деп бааланууда.

Ыкчам-издөө иш-чараларынын жүрүшүндө 2001-жылы туулган Г. Х. МУ. (GH. MU.) аттуу шектүү кармалган. Аны тинтүү учурунда сол бутунун таманынын астынан, шлепанцысынын ичинен жасалма белгилери бар 1 400 АКШ доллары табылып алынган.

Шектүүнүн унаасын тинтүү учурунда милиция кызматкерлери чет өлкөлүк жарандардын эки паспортун, жумушчу визаны, ошондой эле тергөө үчүн мааниси бар башка буюмдарды жана документтерди алышкан. Анын жашаган жеринен да чет өлкөлүк жарандын тил каты жана «Жашыл коридор» программасы боюнча каттарды алуу үчүн арыз баракчалары табылган.

Тергөө иштери уланууда. Укук коргоо органдары кылмыштуу схеманын башка мүмкүн болгон катышуучуларын аныктоо үстүндө иштеп жатышат.