Бишкекте шаар тургунунун унаасын өрттөп кеткен эки шектүү кармалды. Бул тууралуу Свердлов райондук милициясынан билдиришти.

Маалыматка караганда, 15-октябрда саат 22:00-22:30дар аралыгында Элебесов көчөсүндө токтотулуп турган «Мерседес» унаасына белгисиз адамдар өрт коюп кеткен. Бул боюнча унаанын ээси милицияга арыз менен кайрылган.

Аталган фактыга байланыштуу Кылмыш-жаза кодексинин 216-беренеси (Башка бирөөнүн мүлкүн жок кылуу же бузуу) боюнча кылмыш иши козголгон.

Ыкчам-тергөө иштеринин натыйжасында шектүү катары 44 жаштагы И.М. жана 31 жаштагы Ж.Р. аттуу жарандар кармалган. Шектүүлөр убактылуу кармоочу жайга камакка алынган.

Учурда иликтөө иштери уланып, тиешелүү экспертизалар дайындалган.

Биздин Телеграм каналга катталыңыз