Бишкекте тогуз жаштагы мектеп окуучусун сүзүп кетип, өлүмүнө себепкер болгон автобустун айдоочусу убактылуу кармоочу жайга киргизилди. Бул тууралуу борбор калаанын Ички иштер башкы башкармалыгынан (ИИББ) билдиришти.

Посмотреть эту публикацию в Instagram

Публикация от Reporter.kg (@reporter_kg)

Тергөөнүн маалыматына ылайык, эртең мененки саат 09:00 чамасында ZHONG TONG үлгүсүндөгү автобустун Б.М. аттуу айдоочусу Жаш Гвардия бульвары менен түштүктү көздөй бара жаткан. Ал Рыскулов көчөсү менен кесилиштен оңго бурулуп жатып, 9 жаштагы баланы сүзүп алган. Бала жандандыруу бөлүмүнө (реанимацияга) жеткирилген, бирок кийинчерээк ал каза болуп калган.

Жол кырсыгы фактысы боюнча Кыргызстандын Кылмыш-жаза кодексинин 312-беренесинин 3-бөлүгү (“Транспорт каражаттарынын кыймылынын жана аларды пайдалануунун коопсуздук эрежелерин бузуу”) менен кылмыш иши козголду.

Автобус атайын айып короосуна токтотулду. Бул иш боюнча тийиштүү экспертизалар дайындалды.

Айдоочу беш жылдан сегиз жылга чейинки мөөнөткө эркинен ажыратылышы мүмкүн.