Чоң-Алай районунда пайдаланууга берилгенден кийин 1,4 миң гектар жерди сугат суу менен камсыз кыла турган «Миң-Жар» ирригациялык каналынын курулушу уланууда.

Айыл чарба министрлиги билдиргендей, канал Кашка-Суу айыл өкмөтүнүн аймагында курулуп жатат. Долбоор мурда пайдаланылбай келген жана аз түшүмдүү жерлерди айыл чарба жүгүртүүсүнө киргизүүгө мүмкүндүк берет.

Курулуш аяктагандан кийин жаңы сугарылуучу тилкелерде картошка, дан эгиндерин, тоют жана башка айыл чарба өсүмдүктөрүн өстүрүү пландалууда.

Мекеменин маалыматы боюнча, долбоорду ишке ашыруу түшүмдүүлүктү жогорулатууга, мал чарбачылыгы үчүн тоют базасын чыңдоого, жаңы жумуш орундарын түзүүгө жана жергиликтүү тургундардын кирешесин көбөйтүүгө шарт түзөт.

Айыл чарба министрлиги «Миң-Жар» каналы Чоң-Алай районунун ирригациялык инфраструктурасын өнүктүрүү боюнча негизги долбоорлордун бири экенин белгиледи.