Кыргыз Республикасынын Аскер прокуратурасы коррупциялык көрүнүштөр боюнча козголгон кылмыш ишинин алкагында жүргүзүлгөн тергөөнүн жүрүшүндө Бишкек шаардык Өзгөчө кырдаалдар башкармалыгынын кызмат адамдары тарабынан акча каражаттарын системалуу түрдө талап кылуу жана алуу фактыларын аныктады.

Тергөөнүн маалыматына ылайык, кызмат адамдары долбоордук уюмдардын өкүлдөрүнөн долбоордук документтерди оң кароо жана эксперттик корутундуларды даярдоо үчүн мыйзамсыз акча талап кылышкан.

Тергөө маалыматы боюнча, мыйзамсыз сый акынын өлчөмү аныкталган мыйзам бузуулардын мүнөзүнө жана каралып жаткан маселенин татаалдыгына жараша 8 миң сомдон 50 миң сомго чейин өзгөрүп турган.

Аскер прокуратурасы менен Кыргыз Республикасынын Улуттук коопсуздук мамлекеттик комитети биргелешип жүргүзгөн тергөө-ыкчам иш-чараларынын жыйынтыгында Бишкек шаардык башкармалыгынын жетекчилеринин бири М.И. жана улук инспектор А.М. кармалды. Шектүүлөр убактылуу кармоочу жайга киргизилди.

Учурда кылмыш ишинин алкагында зарыл болгон тергөө амалдары улантылууда.