Кыргызстандын Министрлер кабинетинин төрагасынын орун басары Улан Маматканов «ШКУ өлкөлөрүнүн цивилизацияларынын диалогу – 2026» иш-чарасына катышып, өз ара ишенимге, тең укуктуулукка жана маданий көп түрдүүлүктү урматтоого негизделген кызматташтыкты чыңдоонун маанилүүлүгүн билдирди.

Анын айтымында, быйыл Шанхай кызматташтык уюмунун түзүлгөндүгүнө 25 жыл толот. Бул убакыттын ичинде уюм саясий, экономикалык, гуманитардык, маданий жана илимий-технологиялык чөйрөлөрдө өз ара аракеттенүү үчүн эң ири эл аралык аянтчалардын бирине айланды.

Маматканов Кыргызстан ШКУну аймактык кызматташтыктын маанилүү механизми катары караарын жана уюмдагы төрагалыгын өнөктөштүктү андан ары өнүктүрүү үчүн колдонууга ниеттенип жатканын белгиледи.

Ал бүгүнкү күндө технологиялык тез өзгөрүүлөр жана эл аралык мамилелердин трансформациясы шартында мамлекеттер ортосундагы диалог, маданий көп түрдүүлүктү урматтоо жана жалпы чакырыктарга биргелешип чечим издөө өзгөчө мааниге ээ болуп жатканын баса белгиледи.