5-октябрда «Учур» жаштар театры чыгармачылык сезонун ачат. Иш-чара Бишкек шаарындагы Б. Кыдыкеева атындагы Кыргыз мамлекеттик жаш көрүүчүлөр театрынын имаратында өтөт. Бул тууралуу Маданият министрлиги билдирди.

Сезондун ачылышында орус драматургу В. Л. Гуркиндин «Сүйүү жана көгүчкөндөр» пьесасынын негизинде сахналаштырылган «Чиркин өмүр» комедиясы коюлат. Спектаклдин коюучу-режиссёру — Кыргыз Республикасынын Эл артисти Уланмырза Карыпбаев. Чыгармада үй-бүлөлүк мамилелер, сүйүү, ишеним жана адамдык баалуулуктар юмор аркылуу баяндалат.

Жаңы сезондо «Учур» жаштар театры көрүүчүлөргө жаңы спектаклдерди тартуулай турганын билдирди.