Жогорку Кеңештин бюджет, экономика жана фискалдык саясат комитетинде Кыргызстан менен Сауд өнүктүрүү фондунун мамлекеттик мектептерди куруу боюнча келишиминин экинчи фазасынын долбоору каралып, колдоо тапты. Анын алкагында Бишкек шаарында жана Чүй облусунда жети жаңы билим берүү мекемесин куруу каралууда.

Курулуш, архитектура жана турак жай-коммуналдык чарба министринин орун басары Талантбек Иманакун уулунун айтымында, биринчи фазада 30 миллион доллар бөлүнүп, анын негизинде 28 мектеп жана 2 бала бакча курулган. Экинчи фаза боюнча 50 миллион доллар 25 жылга, жылдык 1,5 пайыздык үстөк менен жана беш жылдык жеңилдик мөөнөтү менен берилери күтүлүүдө.