Бишкек шаардык кеңеши 2026-жылдын 31-майындагы № 89 «Бишкек шаарындагы көчөлөрдүн аталыштарын өзгөртүү жөнүндө» токтомун кабыл алды. Бул чечимдин башкы максаты — административдик-аймактык реформанын натыйжасында пайда болгон аталыштардын кайталанышын жоюу жана бир түз сызыкта уланып, бирок ар кайсы тилкесинде ар башка аталган көчөлөрдү бир тартипке келтирүү. Жыйынтыгында бир нече ондогон көчөлөр менен проспектилер бирдиктүү аталыштарга бириктирилди.

Бириктирилген көчөлөрдүн толук тизмеси

Тогуз аталыш жоголгон жок, башка дарекке «көчтү»

Жалпы тизмени кунт коюп салыштырып чыксак, токтомду үстүртөн окуганда байкалбай калышы мүмкүн болгон жагдайды көрүүгө болот: мурдагы көчөлөрдөн алынып салынган кеминде тогуз аталыш шаардын таптакыр башка бөлүгүндөгү жаңы көчөлөргө ыйгарылган. Башкача айтканда, көнүмүш ысымдар жоголгон жок — жөн гана жаңы даректерге «көчүрүлдү»:

• Шабдан Баатыр — проспект макамынан чыкты (Чүй проспектисине кошулду), бирок ошол эле учурда Лев Толстой, Путепроводная жана Сары-Өзөн көчөлөрүн бириктирген тилкенин жаңы аталышы болуп калды.
• Дэн Сяопин — проспект макамын жоготту (Чүйгө кошулду), бирок Береговая, Окраинная, Көк-Сай, К. Курманалиев жана Набережная көчөлөрүнөн куралган көчөнүн жаңы атына айланды.
• Абсамат Масалиев — проспект катары жоюлду (Аалы Токомбаев проспектисине бириктирилди), бирок Анварбек Чортеков менен Кривоносов көчөлөрүн бириктирген көчөгө анын ысымы берилди.
• Анварбек Чортеков — өз кезегинде өзүнчө көчө катары жоюлуп (Абсамат Масалиев көчөсүнө кошулду), кайрадан Исхак Раззаков жана Асипа Темирова көчөлөрүн бириктирген көчөнүн жаңы аталышына айланды.
• Жайыл Баатыр — мурдагы ордунан жоюлуп (Аалы Токомбаев проспектисине кошулду), Ленская жана Юбилейная көчөлөрүн бириктирген тилкенин жаңы аталышы болуп калды.
• Лев Толстой — өзүнүн тарыхый дарегинен кетип (Шабдан Баатыр көчөсүнө кошулду), мурдагы Виноградная көчөсүнүн жаңы аталышы болуп өзгөрдү.
• Манас — өзүнүн мурдагы дарегинен ажырап (Чыңгыз Айтматов проспектисине бириктирилди), Юлиус Фучик менен Васильев трактын бириктирген көчөнүн жаңы аталышы катары кайра берилди.
• Махатма Ганди — мурдагы ордунан жоюлуп (Иманалы Айдарбеков көчөсүнө кошулду), Селекция жана Муромская көчөлөрүнөн куралган көчөнүн жаңы атына айланды.
• Чалагыз Иманкулов — эски дарегинен кетти (Карыбек Тыналиев көчөсүнө кошулду), бирок мурдагы Николай Гоголь (Новопавловка) көчөсүнүн жаңы аталышы болуп калды.

Мындай өзгөрүүнүн практикалык мааниси өтө жөнөкөй: эгер сиз мурда, мисалы, Лев Толстой көчөсүндө жашаган болсоңуз, эми сиздин дарегиңиз Шабдан Баатыр көчөсүнө кирет — ал эми шаарда мурдагы Виноградная көчөсүнүн ордуна таптакыр башка Лев Толстой көчөсү пайда болду. Ошондуктан өткөөл мезгилде көчөнүн бир гана атына карап багыт албай, так дарегин тактап алуу сунушталат.

Мындан ары даректер боюнча кандай иштер жүргүзүлөт?

Учурда Жер ресурстары, кадастр, геодезия жана картография боюнча мамлекеттик агенттиктин Бишкек шаардык филиалы көчөлөрдүн жаңы аталыштарына ылайык дарек номерлерин өзгөртүү иштерин жыйынтыктоодо. Андан соң Бишкек мэриясы жаңы аталыштар жазылган тактачаларды (аншлагдарды) орнотуп, коммуналдык кызматтар менен коомдук транспорттун маалыматтарын жаңылайт.

Даректик регистр мамлекеттик маалыматтык системалар жана базалар менен интеграцияланат, ошондой эле санариптик карталардагы даректер да өз убагында жаңыланышы үчүн маалыматтар «2ГИС» жана «Яндекс Карталар» кызматтарына өткөрүлүп берилет. Мындан тышкары, көчөлөрүнүн аталышы өзгөргөн аймактардын тургундарына даректердин алмашканы тууралуу кабардар кылуу боюнча башка уюштуруу иш-чараларын жүргүзүү убадаланууда.