Бишкек шаарынын мэри Айбек Жунушалиев Кааба уулу Кожомкул атындагы Спорт ордосунун абалы жана аны реконструкциялоого даярдык иштеринин жүрүшү менен таанышты. Текшерүү учурунда имараттын техникалык абалы канааттандырарлык эмес экени белгиленди. Имараттын ичиндеги нымдуулук жогору, айрым конструкциялар жана элементтер кыйла эскирген. Айрыкча жер төлөнүн абалы начар: ал жерде конструкциялардын бузулуу белгилери аныкталган.

Реконструкциянын алкагында инженердик системаларды жана желдетүүнү жаңылоо каралган. Бул имараттын абалын жакшыртып, келгендер үчүн ыңгайлуу шарттарды түзөт.

Мэр имараттын айрым бөлүктөрүн реконструкциялоо же демонтаждоо боюнча чечим шаар куруу кеңешинде маселе каралгандан кийин кабыл алынарын белгиледи. Адистер конструкциялардын абалын баалап, иштерди жүргүзүүнүн эң ылайыктуу жолун аныкташы керек.

Жунушалиев Спорт ордосунун тарыхый элементтерин сактоону эске алууну тапшырды. Анын айтымында, борбор калаанын архитектуралык мурасына аяр мамиле кылуу маанилүү. Реконструкция объекттин коопсуздугун камсыз кылууга жана аны мындан ары максатына ылайык пайдаланууга багытталган.