29-августтан 6-сентябрга чейин Кыргызстанда бир эле учурда эл аралык маанидеги эки иш-чара — ШКУ саммити жана VI Дүйнөлүк көчмөндөр оюндары өтөт. Бул шаар үчүн майрам гана эмес, бир катар чектөөлөрдү да алып келүүдө: айрым көчөлөр жабылат, жер алдындагы өтмөктөрдүн иши токтотулат, соода борборлору жана базарлар убактылуу жабылат. Бишкекте жана аймактарда бул күндөрү эмне өзгөрөрүн жана кантип жүрүүгө болорун карап чыгабыз.

29 жана 30-август — кадимки ишемби жана жекшемби күндөрү. 31-август — Эгемендүүлүк күнү, жумуш эмес майрам күнү. 1-сентябрь Бишкектеги бюджеттик мекемелердин кызматкерлери үчүн эс алуу күнү деп жарыяланды, жеке компаниялардын кызматкерлери үчүн бул милдеттүү талап эмес, сунуш катары каралууда. Ошол эле учурда окуу жылынын башталышы 15-сентябрга жылдырылды, быйыл окуучулар менен студенттер салтанаттуу линейканы адаттагыдан эки жума узагыраак күтүшөт.

22-августта эмне болду

22-августта Көчмөндөр оюндарынын ачылыш аземинин генералдык репетициясы өттү. Мындан улам саат 10:00дөн 19:00гө чейин Аалы Токомбаев проспектисинин жана Д. Куюкова көчөсүнүн аймагындагы бир нече көчөдө кыймыл чектелди. Көптөгөн кыргызстандыктар үчүн бул жагымсыз күтүүсүз болду: адатта автобустар каттаган маршруттарда кыйла аз жүрдү, бул тууралуу болсо, алдын ала эч ким эскерткен эмес.

Бул окуялар артта калганы менен ушул сыяктуу айрым жерлерде жабуулар кийинки күндөрү, аземдер жакындаганда да болушу мүмкүн экенин көрсөттү. Бул жолу алар жөнүндө алдын ала билип алган жакшы.

29-август: жер алдындагы өтмөктөр жабылат

29-август саат 15:00дөн тартып төрт жер алдындагы өтмөк жабылат: Ч. Айтматов проспектиси менен М. Горький көчөсүнүн кесилишинде, Чүй проспектиси менен Манас проспектисинин (азыркы Ч. Айтматов проспектиси) кесилишинде, Манас көчөсү менен Васильевский тракттын (азыркы Манас көчөсү) аймагында, ошондой эле Чүй проспектиси менен Ю. Абдрахманов көчөсүнүн (Old Bishkek) кесилишинде. Эгер сиздин кадимки маршрутуңуз бул жолдордун бири аркылуу өтсө, алдын ала жер үстү аркылуу же жакынкы башка өтмөктөр аркылуу айланып өтүү жолун ойлонуп коюу керек.

30-август — 6-сентябрь: жолдордо чектөөлөр киргизилет

Бул күчөтүлгөн чаралардын негизги мезгили: ИИМ Бишкектин бир нече негизги тилкелеринде: «Манас» эл аралык аэропортунун жанында, Васильевский трактта, Фучик көчөсүндө, Чүй, Манас жана Чыңгыз Айтматов проспектилеринде, Абдрахманов жана Байтик Баатыр көчөлөрүндө, Абсамат Масалиев проспектисинде, Жайыл Баатыр жана Барпы Алыкулов көчөлөрүндө кыймылды чектеп, көзөмөлдү күчөтөт.

Ушундай эле убактылуу чектөөлөр Чүй облусунун айрым жолдорунда жана Ысык-Көл облусунда да киргизилет. Атап айтканда, «Тамчы» аэропортунан Чолпон-Атага чейинки тилкеде, ипподромдун аймагында жана Кырчын капчыгайына баруучу жолдо.

«Манас» аэропорту: каттамдардын убактысы өзгөрүшү мүмкүн

31-августта жана 1-сентябрда «Манас» аэропорту да өзгөчө тартипте иштейт. 31-августта саат 09:00дөн 20:00гө чейин жүргүнчүлөрдү кабыл алуу жана каттамдарды учуруу убактылуу чектелет, бул убакта борбор калаага ШКУ саммитинин катышуучулары келет. 1-сентябрда ушундай эле чектөөлөр саат 10:00дөн 22:00гө чейин киргизилет.

Авиакомпанияларга каттамдардын графигин алдын ала өзгөртүү, учууларды башка убакытка жылдырууга мүмкүнчүлүк болбосо, каттамдарды токтотуу сунушталды. Андыктан ушул күндөргө билетиңиз болсо, аэропорттон тактоого аракет кылгандан көрө, учуу убактысы өзгөргөн-өзгөрбөгөнүн авиакомпаниядан алдын ала тактап алганыңыз оң.

31-август жана 1-сентябрь: соода борборлору жана базарлар жабылат

Расмий делегациялардын каттамдарынын коопсуздугун камсыз кылуу максатында 31-августта жана 1-сентябрда он соода борборунун иши убактылуу токтотулат: ГУМ «Чынар», ЦУМ «Айчүрөк», «Бишкек Парк», «Азия Молл», «Ала-Арча», «VEFA Центр», «Дом торговли», «Гоин», Beta Stores 1 жана «Беш Сары Сити». «Ош базары» жана «Сары-Өзөн» базарлары менен соода комплекстери 31-августта (санитардык күн), ошондой эле 1 жана 2-сентябрда иштебейт; «Орто-Сай» базары 31-августта жана 1-сентябрда жабылат. Райондордун башчыларына делегациялардын маршруттарындагы соода түйүндөрүн кошумча аныктап, алардын ишин да убактылуу токтотуу тапшырылды. Андыктан бул күндөрү кайсы бир дүкөн же базар ачыкпы-жокпу алдын ала тактап алган оң.

Ошондой эле бул күндөрү «Унаага» барышы керек болгондор эске ала турган жагдай бар: 31-августта Эгемендүүлүк күнүнө байланыштуу бардык бөлүмдөр жабык болот. Ал эми 1-сентябрда Бишкекте ШКУ саммитине байланыштуу дароо төрт бөлүм — Аламүдүн, «Биримдик», Чыгыш жана «Аю Гранд» соода борборундагы бөлүмдөр иштебейт. Мындан тышкары, «РИОМ» унаа базарындагы бөлүм 1-сентябрда кадимки режимде иштейт.

Эгер чет өлкөлүк номерлүү автоунааны мыйзамдаштырууну пландап жатсаңыз, муну да создуктурбаганыңыз оң — мындай унааларды легалдаштыруунун мөөнөтү 1-сентябрда аяктайт.

Жолдо жүрүүнү кантип пландаштыруу керек

ИИМ мүмкүн болушунча жеке унаадан коомдук транспортко өтүүнү сунуштады. Өзгөчө 30 жана 31-августта, Көчмөндөр оюндарынын ачылышына байланыштуу борбор калаада жол кыймылынын көбөйүшү күтүлүүдө.

Иш-чаралар өтүп жаткан күндөрү коомдук транспорт учурдагы каттамдар боюнча үзгүлтүксүз иштери убада кылынууда. Ал эми ачылыш аземи үчүн шаардын 21 жеринен кошумча шаттл-бастар уюштурулат — бул, кыязы, жол тосууларга кабылбастан бара турган жерге жетүүнүн эң ишенимдүү жолу.

Практикалык кеңештер: эгерде сиздин жолуңуз аталган көчөлөр же жер астындагы өтмөктөр аркылуу өтсө, каттамыңызды алдын ала текшерип, 30-августтан 6-сентябрга чейин жолго көбүрөөк убакыт бөлүңүз. Ал эми бул күндөрү Ысык-Көл тарапка, өзгөчө жолуңуз Тамчы — Чолпон-Ата тилкеси же Кырчын тарапка боло турган болсо, сапарды убакытты ашыгы менен эсептеп пландаганыңыз оң. 31-августтан 2-сентябрга чейин соода борборлоруна же базарларга барардан мурда, барганда билип калып убара болбош үчүн, жабык боло турган объекттердин тизмесин алдын ала тактап алыңыз.

Шаар бул күндөргө олуттуу даярданып жаткандай — коммуналдык кызматтар «Бишкектеплоэнерго», «Бишкексвет» жана «Бишкекгаз» күчөтүлгөн режимде иштөөгө өтүп, окуу жылынын башталышы да эки жумага жылдырылды.

Кыязы, шаар бул күндөргө олуттуу даярданып жатат, атүгүл «Бишкектеплоэнерго», «Бишкексвет» коммуналдык кызматтары жана «Бишкекгаз» газ кызматы күчөтүлгөн иш тартибине өтүшүүдө, ал эми окуу жылынын башталышы эки жумага кийинкиге жылдырылды.