Бишкек шаарынын мэриясы «Биримдик Кут» конушундагы окуучуларды ташуу үчүн кошумча бир мектеп автобусун бөлдү. Бул тууралуу мэриянын басма сөз кызматы билдирди.

Маалыматка ылайык, 2025-жылдан бери бул багытта эки автобус иштеп келген болсо, учурда окуучуларды үч транспорт каражаты тейлөөдө.

Ошондой эле мекеме жол кыймылынын коопсуздугун камсыздоо максатында аталган конушка кошумча светофорлорду орнотуу пландалып жатканын билдирди.

Мындан тышкары келечекте аймакка автобус каттамын ишке киргизүү каралган. Учурда «Биримдик Кут» конушунда №177 кичи автобус каттамы иштеп жатат. Күн сайын бул каттамга 14 унаа чыгат.