Бишкек шаардык транспорту муниципалдык ишканасында автобус айдоочулары менен жолугушуу болуп, анда акыркы үч айдагы ишмердүүлүк боюнча отчет угулганын муниципалитет кабарлады.

Жолугушууда айдоочулардын эмгек шарттарын жакшыртуу, жол кыймылынын коопсуздугун камсыздоо жана жүргүнчүлөргө кызмат көрсөтүү сапатын жогорулатуу боюнча чаралар талкууланды.

Айдоочуларга жол кыймылынын негизги эрежелерин сактоо, аялдамаларда туура токтоо жана жүргүнчүлөргө сылык мамиле кылуу зарылдыгы эскертилип, буга байланыштуу бир катар тапшырмалар берилди.

Мындан тышкары, эрежелерди бузуу учурлары талданды жана мындай көрүнүштөрдү алдын алуу багытында жүргүзүлүп жаткан иштер белгиленди.