31-июлда Чолпон-Ата шаарында Борбордук Азия мамлекеттеринин башчыларынын жана Азербайжандын президентинин бейформал консультативдик жолугушуусу өттү. Жолугушуунун жыйынтыгында мамлекет башчылары Чолпон-Ата декларациясына кол коюшту. Бул тууралуу Кыргыз Республикасынын президенттик администрациясы билдирди.

Жолугушууга Кыргызстандын президенти Садыр Жапаров, Казакстандын президенти Касым-Жомарт Токаев, Өзбекстандын президенти Шавкат Мирзиёев, Тажикстандын президенти Эмомали Рахмон, Түркмөнстандын президенти Сердар Бердымухамедов жана Азербайжандын президенти Ильхам Алиев катышты.

Жолугушууну ачып жатып, Садыр Жапаров акыркы жылдары мамлекеттик чек ара маселелеринин жөнгө салынышы жана өз ара ишенимдин чыңдалышынын аркасында Борбордук Азиядагы кызматташтык сапаттык жаңы деңгээлге чыкканын белгиледи. Ошондой эле ал аймак өлкөлөрүнүн лидерлерине Кыргызстандын БУУнун Коопсуздук кеңешинин 2027–2028-жылдардагы туруктуу эмес мүчөлүгүнө талапкерлигин колдогону үчүн ыраазычылык билдирди.

Президент Кытай — Кыргызстан — Өзбекстан темир жолунун курулушунун жана Казакстан менен Өзбекстан биргелешип ишке ашырып жаткан Камбар-Ата ГЭС-1 долбоорунун стратегиялык маанисин белгиледи. Мындан тышкары, ал Борбордук Азия өлкөлөрүнө келген чет өлкөлүк жарандар үчүн бирдиктүү туристтик визаны киргизүү демилгесин иштеп чыгууну сунуштады.

Жолугушуунун жүрүшүндө мамлекет башчылары аймактык кызматташтыкты мындан ары тереңдетүү, транспорттук-логистикалык байланыштарды өнүктүрүү, энергетикалык коопсуздукту камсыз кылуу жана климаттын өзгөрүшүнө ыңгайлашуу маселелерин талкуулашты.

Саммиттин жыйынтыгын чыгарып жатып, Садыр Жапаров кол коюлган Чолпон-Ата декларациясы Борбордук Азия мамлекеттери менен Азербайжандын ортосундагы ишенимдин жогорку деңгээлин жана аймактык кызматташтыкты мындан ары кеңейтүүгө болгон умтулуусун чагылдырарын белгиледи.