Борбордук Азия жана Азербайжан мамлекет башчылары Чолпон-Атада өткөн формалдуу эмес консультативдик жолугушуунун жыйынтыгында биргелешкен Чолпон-Ата декларациясын кабыл алышты, деп билдирет КР Президентинин басма сөз кызматы.

Жолугушууну ачып жатып, Кыргызстандын Президенти Садыр Жапаров мамлекеттик чек ара маселелерин жөнгө салуунун жана өз ара ишенимди бекемдөөнүн аркасында акыркы жылдары аймактагы кызматташуу сапаттык жаңы деңгээлге чыкканын белгиледи.

Ал аймак өлкөлөрүнүн лидерлерине 2027–2028-жылдарга БУУнун Коопсуздук Кеңешине Кыргызстандын талапкерлигин колдогондугу үчүн ыраазычылык билдирип, республика эл аралык аренада Борбордук Азиянын жалпы кызыкчылыктарын ырааттуу түрдө илгерилетүүгө ниеттенип жатканын баса белгиледи.

Жапаров ошондой эле транспорттук байланыштарды жана энергетикалык кызматташтыкты өнүктүрүүгө басым жасады. Атап айтканда, ал «Кытай — Кыргызстан — Өзбекстан» темир жолун куруунун жана Казакстан, Өзбекстан менен биргеликте Камбар-Ата-1 ГЭСинин долбоорун ишке ашыруунун стратегиялык маанисин белгиледи.

Садыр Жапаров туризм тармагын өнүктүрүүгө өзүнчө токтолду. Ал Борбордук Азия өлкөлөрүнө келген чет элдик жарандар үчүн бирдиктүү туристтик виза киргизүү боюнча Кыргызстандын демилгесин эске салып, макулдашылган чечимдерди иштеп чыгуу зарылдыгын баса белгиледи.

Кыргызстандын Президенти ошондой эле консультативдик жолугушуулар форматында Түркмөнстандын төрагалыгын жогору баалап, кыргыз тарап 2026-жылдын 8-октябрында Авазада өтө турган Борбордук Азия жана Азербайжан Республикасынын мамлекет башчыларынын Сегизинчи консультативдик жолугушуусун өткөрүүгө көмөктөшүүгө даяр экенин ырастады.

Жолугушуунун жүрүшүндө мамлекет башчылары аймактык кызматташтыкты мындан ары тереңдетүү, транспорттук-логистикалык байланыштарды өнүктүрүү, климаттын өзгөрүшүнө ыңгайлашуу жана энергетикалык коопсуздукту камсыз кылуу маселелерин талкуулашты.

Сүйлөшүүлөрдүн жыйынтыгында президенттер Чолпон-Ата декларациясына кол коюшту.

Жолугушууну жыйынтыктап жатып, Садыр Жапаров бул документ аймак мамлекеттери менен Азербайжандын ортосундагы ишенимдин жогорку деңгээлин, алардын тынчтык, ынак коңшулук жана туруктуу өнүгүү принциптерине берилгендигин, ошондой эле аймактык кызматташууну мындан ары кеңейтүүгө болгон умтулуусун чагылдырарын белгиледи.