Бишкектин Ленин районундагы Шота Руставели көчөсүндө (Ахунбаев көчөсүнөн жогору) жайгашкан короолордун биринин жашоочулары унаалары менен жумушка бара албай калышты. Анткени катуу шамалдан кийин кулаган дарак короодон чыгуучу жолду тосуп калган.

Шаар тургундарынын айтымында, алар кечээ эле саат 20:50дө муниципалитеттин кызматтарынын бирине билдирүү калтырып, сүрөттөрүн да тиркеп жөнөтүшкөн. Бирок шаардык кызматтар кулаган даракты ошол бойдон тазалаган эмес.

Белгилей кетсек, Бишкек шаарынын мэринин турак жай-коммуналдык чарба маселелери боюнча орун басары Рамиз Алиевдин социалдык тармактардагы расмий баракчасында муниципалитет кызматкерлеринин калаанын борбордук жана ага чектеш көчөлөрүндө кечээки шамалдын кесепеттерин жоюп (тазалап) жаткан көптөгөн видеолору жарыяланган.