БУУнун көз карандысыз эксперттер тобу АКШ бийлигин иммиграциялык судьяларды массалык түрдө кызматтан алууну жана иммиграциялык соттордун ишин саясатташтырууну токтотууга чакырды. Алар мындай аракеттер сот системасынын көз карандысыздыгына жана эл аралык коргоого муктаж адамдардын укуктарына коркунуч жаратарын белгилешти.

Эксперттердин маалыматына ылайык, 2025-жылдын январынан бери АКШда 113 иммиграциялык судья, башкы судьялардын 13 жардамчысы жана апелляциялык инстанциянын тогуз судьясы кызматтан алынган. Алардын айтымында, кызматтан алуулар эч кандай түшүндүрмөсүз жүргүзүлгөн.

Өзгөчө тынчсызданууну жараткан жагдай – маалыматы ачык болгон 78 судьянын 65и башпаанек берүү боюнча өтүнүчтөрдү өлкө же тиешелүү сот боюнча орточо көрсөткүчтөн көбүрөөк канааттандырган. Ошондой эле мигранттарды жана гуманитардык жардамды коргоо жаатында тажрыйбасы бар, мурдагы президенттик администрация тарабынан дайындалган судьялар көбүрөөк кызматтан алынганы белгиленди.

Эксперттер иммиграциялык судьялар депортацияланган учурда кыйноого, куугунтукка же өмүрүнө коркунуч жаралышы мүмкүн болгон адамдардын тагдырын чечерин белгилешти. Алардын айтымында, судьяларга болгон басым чет өлкөлүк жарандарды иштерин адилет кароого болгон мүмкүнчүлүктөн ажыратат.

Ошондой эле эксперттер АКШнын Юстиция министрлиги 50дөн ашуун жаңы көрсөтмө чыгарганына тынчсыздануусун билдиришти. Алардын арасында иштерди «жай» же «бир жактуу» кароо үчүн дисциплинардык чара көрүү мүмкүнчүлүгү да каралган. Мындан тышкары, бир судья бир нече сааттын ичинде жүздөгөн иштерди караган «мега-угуулар» практикасы сынга алынды.

БУУ АКШ кыйноо же куугунтук коркунучу бар өлкөлөргө адамдарды кайтарууга тыюу салган эл аралык милдеттенмелерди сактоого тийиш экенин эскертип, иммиграциялык соттордун көз карандысыздыгын жана адилет соттук териштирүү укугун камсыздоого чакырды.