Үстүбүздөгү жылдын январь-июнь айларына карата Кыргызстанда орточо айлык акы 42 миң 20 сомду түздү. Бул өткөн жылдын ушул мезгилине салыштырмалуу 19,6%га көп. Мындай маалыматтар Улуттук статистика комитетинин пресс-конференциясында айтылды.

Маалыматка ылайык, инфляцияны эске алганда, быйыл реалдуу айлык акынын көлөмү 11,5%га өскөн.

Айлык акылар эң көп төмөнкү тармактарда өскөн:

• кыймылсыз мүлк менен болгон операциялар — 40,3%га;
• курулуш тармагы — 39,4%га;
• административдик ишмердүүлүк — 30,1%га;
• саламаттык сактоо жана социалдык тейлөө — 27,3%га;
• кесиптик, илимий жана техникалык ишмердүүлүк — 27,3%га;
• мейманканалар жана ресторандар — 26,2%га;
• мамлекеттик башкаруу, коргонуу жана милдеттүү социалдык камсыздоо — 24,2%га;
• финансылык ортомчулук жана камсыздандыруу — 22,9%га;
• башка тейлөөчү тармактар — 21,3%га.