Бүгүн, 26-январдагы Жогорку Кеңештин жыйынында депутаттар тарабынан бир катар социалдык-экономикалык көйгөйлөр көтөрүлдү.
Депутат Камила Талиева Баткен облусундагы Бели-Сынык ашуусундагы жолду оңдоо иштери токтоп калганын белгилеп, аталган жолдун аймак үчүн мааниси жогору экенин эске алуу менен тездетүү керектигин кошумчалады.
Муну менен катар кыргыз-тажик чек арасында орун алган жаңжалда үйү тонолгондордун мүлкүн калыбына келтирүү маселесине токтолду.
“Жаңы-Жер айыл өкмөтүндө үйлөрү тонолуп кеткендер кенемте же жардам берилген эместигин айтып жатышат. Алардын баалуу буюмдары, эмеректери тонолгон. Бирок, кенемте төлөнгөн эмес”, — деди Талиева.
Баткендеги социалдык көйгөйлөр тууралуу айткан депутат Ырысбек Атажанов да бир катар мектептер авариялык абалда экенин жүйө келтирди.
Биздин Телеграм каналыбызга катталыңыз
