Аскер кызматкерлери, күч түзүмдөрүнүн кызматкерлери жана алардын үй-бүлө мүчөлөрү атайын аскердик медициналык мекемелердин жетишсиздигинен улам медициналык жардам алууда кыйынчылыктарга туш болуп жатышат. Бул тууралуу Жогорку Кеңештин жыйынында депутат Райимберди Дүйшенбиев билдирди.

Анын айтымында, мамлекет тарабынан Куралдуу күчтөргө олуттуу колдоо көрсөтүлүп жатканына карабастан, аскердик медицинаны өнүктүрүү маселеси дагы эле артта калууда.

Депутат Өзгөчө кырдаалдар министрлиги менен Чек ара кызматы сыяктуу бир катар күч түзүмдөрүнүн өз госпиталдары жок экенин белгиледи. Мындан улам алардын кызматкерлери мамлекеттик медициналык мекемелерге кайрылууга аргасыз болууда. Ошол эле учурда учурдагы ооруканалар бейтаптарга толуп, жүктөмү күчөгөн.

Мындан тышкары, Дүйшенбиев күч түзүмдөрүнүн айрым медициналык мекемелери эскирген жабдуулар менен иштеп жатканын, ал эми аскердик дарыгерлер татаал операцияларды жүргүзүү боюнча жетиштүү практикага ээ болбой жатканын айтты. Анын пикиринде, бул өзгөчө кырдаалдарда медициналык жардам көрсөтүүнүн сапатына терс таасирин тийгизиши мүмкүн.

Парламентарий ошондой эле аймактарда тажрыйбалуу дарыгерлердин жетишсиздигин, медициналык мекемелердин заманбап жабдуулар менен толук камсыздалбаганын жана адистердин жеке секторго же чет өлкөлөргө кетип жатканын белгиледи.

Ушуга байланыштуу депутат аскердик медицинаны өнүктүрүү, заманбап медициналык объекттерди куруу жана аскердик дарыгерлерди даярдоо үчүн шарттарды жакшыртуу боюнча иштерди күчөтүүнү сунуштады.